लहान नगरपालिकामा पहिलो पटक माटो परीक्षण हुँदै

जिवछ उदासी 
 लहान, जेठ २९ गते । लहान नगरपालिका कृषि शाखाले लहान नगरपालिकाको सम्पूर्ण वडाहरुमा माटो परीक्षण कार्य सुरु गरेको छ । यस नगरपालिकामा माटो परीक्षण पहिलो पटक हुन लागेको हो । 
 कृषि शाखाका प्रमुख प्रकाश साहका अनुसार यस नगरपालिकाको ग्रामीण भेगका वडाहरुमा भइरहेको कृषिलाई आधुनिकीकरण गर्नको लागि कृषकहरुमा शिक्षा चेतना र प्रशिक्षणको आवश्यक्ता रहेको छ । परम्परागत रुपमा अन्दाजीको भरमा खेतमा प्रयोग गरिरहेको रसायनिक मलको कारण खेतमा क्षयीकरण बढेर कुनैपनि वाली फष्टाउन सक्दैन । यस पटक ६ जना प्राविधिकले १३ दिन लगाएर माटो परीक्षण गर्न लागेको हो । 
 लहान नगरपालिका कृषि शाखाका संयोजक प्रदिप कुमार चौधरीले नगरपालिका कृषि आधुनिकीकरण कार्यक्रम अन्तर्गत उन्नत जातको धानको विउ, मलखाद्यको प्रवन्ध र ९ प्रकारका विरुवाहरुमा आँप, लिची, कटहर, कागती, मेवा, अनार लगायतका विरुवाहरु ५० प्रतिशत अनुदानमा वितरण गरिएको भन्दै कृषकहरुमा जागरुक्ता र उत्सुकता बढ्दै जान थालेकोले नगरपालिकाले लिएको लक्ष्य अनुसार कार्यक्रमहरु अघि वढिरहेको बताउनुभयो । 
 यता लहान नगरप्रमुख मुनि साहले कृषिलाई आधुनिकीकरण , यान्त्रीकिकरण र बजारीकरणको लागि चाहिने पूर्वाधार निर्माणको लागि लहान नगरपालिकाको क्षेत्रफल र जनसंख्याको आधारमा चाहिएको बजेट संघ र प्रदेश सरकारबाट सहयोग भए लक्ष्यमा पुग्न सघाउ पुग्ने भन्दै आफ्नो श्रोत र साधनले भ्याएसम्म सिंचाइको लागि बोर्डिङग,विद्युतीकरण, उन्नत विउ विजन जस्ता कार्यक्रमहरुलाई प्राथमिकतामा राखेर अघि बढिरहेको बताउनुभयो ।