महोत्तरी ३ बाट महन्थ ठाकुर र सर्लाही २ बाट राजेन्द्र महतोले मनोनयन दर्ता गराए

सिरहा, २३ असोज । लोकतान्त्रिक समाजवादी पार्टी नेपालका अध्यक्ष महन्थ ठाकुरले महोत्तरी निर्वाचन क्षेत्र नं. ३ मा प्रतिनिधिसभा सदस्य उम्मेद्वारका लागि मनोनयन दर्ता गराएका छन् भने राजेन्द्र महतोे सर्लाही २ बाट प्रतिनिधिसभा सदस्य उम्मेद्वारका लागि मनोनयन दर्ता गराएका छन् ।

अध्यक्ष ठाकुर र महतोले पाँच दलीय गठबन्धनको साँझा उम्मेद्वारको रुपमा मनोनयन दर्ता गराएका हुन् ।

अध्यक्ष ठाकुसँगै प्रदेशसभा सदस्यका लागि ३ को (क) मा अभिराम शर्मा र (ख) मा रानी शर्मा तिवारीले पनि मनोनयन दर्ता गराएका हुन् ।

त्यसैगरी लोकतान्त्रिक समाजवादी पार्टी नेपालका वरिष्ठ नेता एवं पूर्वउपप्रधानमन्त्री राजेन्द्र महतोले सर्लाही २ बाट प्रतिनिधिसभा सदस्य उम्मेद्वारका लागि मनोनयन दर्ता गराएका छन् ।

वरिष्ठ नेता महतो यसअघि धनुषा ३ बाट प्रतिनिधिसभा सदस्यमा निर्वाचित भएका थिए । तर यसपटक महतो आफ्नै गृहजिल्ला फर्किएका हुन् ।

पाँच दलीय गठबन्धनमा लोसपाले सर्लाही २ मा मित्रवत् प्रतिस्पर्धा गर्ने सहमति गरेको थियो ।

पाँच दलीय गठबन्धनकै अर्का उम्मेद्वार नेपाल समाजवादी पार्टीका अध्यक्ष महेन्द्र राय यादव माओवादी केन्द्रको चुनाव चिन्हबाट उम्मेद्वारी दिएका हुन् ।

सर्लाही २ मा सहमति नजुटेपछि मित्रवत् प्रतिस्पर्धा गर्ने भएको छ ।

यसैगरी, प्रदेशसभा सदस्यका लागि सर्लाही २ (क) मा कांग्रेसका जंगीलाल राय र (ख) मा लोसपाका मेथुर चौधरीले मनोनयन दर्ता गराएका हुन् ।