स्वतन्त्र उम्मेदबार कार्कीद्वारा औठा छाप गरेर १५ बुुँदे प्रतिबद्धता सार्वजनिक

 

जीबछ उदासी 

लहान,कातिक ७ गते । 

सिरहा निर्वाचन क्षेत्र -२ का प्रतिनिधि सभाको स्वतन्त्र बामपन्थी उम्मेदबार सुरेश कुमार कार्कीले नेपाली (बसहा) कागजमा लिखित र औठा छाप सहितको प्रतिवद्धता पत्र पत्रकार समेलन गरी सार्वजानिक गर्नु भएको छ । 

 धनगडीमाई नगरपालिकाको प्राकृतिक अस्पतालको हलमा सोमबार पत्रकार सम्मेलन गरी यस्तो प्रतिवद्धता ब्यक्त गर्नु भएको हो ।  प्रतिवद्धता गरेका १५ बुँदे कार्य गर्न नसके आफू राजीनमा समेत गर्ने उहाँले पत्रकार सम्मेलनमा बताउनुभयो । 

१५ बुँदामा निर्वाचित भएको ७ दिनमा राष्ट्रपति कार्यालय आगाडि अनसन बसेर नागरिकता समस्या समाधान गर्ने,सिरहा २ मा ५० शैयाको अत्याधुनिक अस्पताल निर्माण,ज्येष्ठ नागरिक रसुत्केरी महिलाको उपचारमा सहयोग पुरयाउने एम्बुलेन्सको व्यवस्था,कम्पोष्ट मल उत्पादन गर्न कारखाना खोल्ने लगायतका प्रतिवद्धताहरु समेटिएको छ । 

२९ वर्ष वकालत पेशा साढे सात वर्ष रेडियो नेपालको कार्यकारी निर्देशक भएर काम गर्नु भएको कार्की यस क्षेत्रको भावना र चाहना अनुसार बामपन्थी दलहरुबाट उम्मेदबार नभएकोले आफू उम्मेदबार भएको प्रष्टयाउनुभयो ।

बरियारपटि,औरही,नवराजपुर गाउँपालिका,सुखीपुर र धनगडीमाइ नगरपालिका रहेको यस क्षेत्रमा एक लाख सात हजार ४६५ मतदाता रहेको छ । सता गठबन्धनबाट नेपाली काँग्रेसको उम्मेदबार चित्रलेखा यादव,एमाले जसपा गठबन्धनबाट जसपा उम्मेदबार राजकिशोर यादव,स्वतन्त्र उम्मेदबार राम रिझन यादव,देव कुमार यादव लगायतका चर्चित अनुहारहरु प्रतिनिधिसभाको उम्मेदबार रहेका छन् । सुखीपुर नगरपालिका र धनगडीमाई नगरपालिकामा नेकपा एमाले,बरियारपटि,औरही र नवराजपजर गाउँपालिकामा जसपाले स्थानीय निर्वाचनमा जीत हासिल गरेको छ ।