फकिरचन्द्रगामी मावि बरकुर्बाको साँख खस्किँदै

 

जीवछ उदासी 

धनुषा असोज १५ गते ।

धनुषा जिल्लाको सबैला नगरपालिका -१२ मा अवस्थित श्री फकिरचन्द्रगामी माध्यमिक विद्यालयको पुरानो साँख खस्किँदो अवस्थामा पुगेपछि स्थानीयहरु चिन्तित देखिएका छन् ।

मधेशमा शिक्षाको अवस्था र अपेक्षा पत्रकारिता तालिममा प्रशिक्षण दिन आउनु भएको शिक्षाविद डा विद्या नाथ कोइराला ,शिक्षा अभियन्ता टिका भट्टराई वरिष्ट पत्रकार चन्द्रकिशोर झा,शिक्षा पत्रकार समूहका अध्यक्ष कृष्ण मल्ल शिक्षक मासिकका सम्पादक राजेन्द्र दाहाल र तालिममा सहभागी मधेश प्रदेशका पत्रकारहरुले विद्यालयको अवस्था बुझ्न आईतवार विद्यालयमा पुगेपछि स्थानीयहरुले यस्तो चिन्ता व्यक्त गरेका थिए ।

२०१६ सालमा स्थापना भएको फकिरचन्द्रगामी मावि बरकुर्बा केहि दशक आगाडि धनुषा जिल्लाकै नाम र प्रतिष्ठा कमाएको यस विद्यालयको अवस्था र व्यवस्था कसरी सुधरिने पत्रकारहरुले कलम चलाएर सहयोग गरिदिनुपर्ने स्थानीय विनोद साहले पीडा पोख्नुभयो । 'वरिपरिका विद्यालयहरुले गति लिइरहेको बेला शिक्षाको क्षेत्रमा नाम चलेको हाम्रो विद्यालयको हिरोबाट जिरो बन्दैछ । बिद्यालयको ऐतिहासिक साँख झर्दै गइरहेको छ । हामी स्थानीय अभिभावकहरु चिन्तित भएर के गर्नु प्रधानाध्यापक बैजनाथ साहले सुने पो केहि हुनेछ',स्थानीयहरुले गुनासो पोख्नुभयो । 

 अहिले विद्यालयमा दुई वटा व्यवस्थापन समिति गठन गरेर प्रधानाध्यापक साहले स्वार्थसिद्धिमा लागेको अर्का स्थानीय विनोद पालले बताउनुभयो । लापरवाहीको पनि सिमा हुन्छ कक्षा ११ मा पढ्ने विधार्थीहरुको १५ थान मार्कसिट देखाउँदै यी मार्कसीटहरु चटपटे पसलमा भेटाएको देखाउनुभयो । उहाँले थप्नुभयो,'प्रधानाध्यापक जिम्मेबार नभएसम्म विद्यालयको अवस्था सुध्रिनेवाला छैन । हामी स्थानीयहरु आजित भैसक्यौ ।'

म आफूपनि यहि विद्यालयबाट २०६३ सालमा एसएलसी उतीर्ण गरेको सञ्चारकर्मी रामएकबाल महराले भन्दै त्यतिबेला बाह्र सय विधार्थी संख्या रहेको थियो ,अहिले ४२५ मा विधार्थी संख्या ओरालो लागेको चिन्ता व्यक्त गर्नुभयो । पूर्व गभर्नर दिपेन्द्र बहादुर क्षेत्री,नेकपा माओवादीको केन्द्रीय नेता पूर्व मन्त्री मातृका प्रसाद यादव लगायत उच्च तहमा पुगेका व्यक्तिहरु यसै विद्यालयबाट शिक्षा हासिल गर्नुभयो । धनुषा जिल्लामा नाम चलेको यो विद्यालयको साँख खिस्कँदा स्थानीयहरु चिन्तित हुनु स्वभाविकै हो,उहाँले भन्नुभयो । 

 एक देखि कक्षा आठ सम्म खासै विधार्थी नरहेको प्रअ बैजनाथ साहले जानकारी दिँदै कक्षा ९र १० विधार्थी संख्या आशाजनक रहेको जानकारी दिनुभयो । पुरानो ऐतिहासिक विद्यालयको यो अवस्था कसरी भयो भने सञ्चारकर्मीहरुको जिज्ञासा राख्दा प्रअ साहले भन्नुभयो,'आठवटा माविको शिक्षक दरबन्दी थियो अहिले ६ रहेको छ । निमाबिबाट पनि दुई जना दरबन्दीको शिक्षक अरु विद्यालयमा नै रहेको छ । जम्मा १७ जना शिक्षक छौ । विद्यालयबाट सरुवा भएर जादा पनि विद्यालयमा सरुवा भएर आउँदापनि दुइ दुइ लाखको दरले बुझाउनुपर्ने नियम नै भएको छ ।' 

विद्यालयको सुधारको लागि प्रअले सक्रिय भूमिका खेल्नुपर्छ भनेर केहि समय डा विद्यानाथ कोइरालाले सहजीकरण गर्नु भएको थियो । 

साढे तिन बजे विद्यालयमा पुग्दा कुनै कक्षामा विधार्थी थिएन भने शिक्षकहरु कार्यालयमा बसेर गफिदै थिए,विद्यालय हाताभित्र बाख्राहरु चर्दैथिए ।