प्रधानाध्यापक साह मृत्यु प्रकरण : दोषीमाथि कारबाहीको माग गर्दै मिर्चैमामा प्रदर्शन

सिरहा । पूर्व पश्चिम राजमार्गअन्तरगत सिरहाको मिर्चैमामा सडक अवरुद्ध गरिएको छ । जिल्लाको गोलबजार नगरपालिका ३ स्थित सरस्वती माध्यमिक विद्यालय तेतरिया जमदहका प्रधानाध्यापक सञ्जिव कुमार साह मृत्यु प्रकरणको छानबिन गरी दोषीमाथि कारबाहीको माग गर्दै परिवारजन तथा स्थानीयले पूर्व पश्चिम राजमार्ग अन्तर्गत मिर्चैयामा सडक अवरुद्ध गरेका हुन् ।

मिर्चैया नगरपालिका ७ का प्रधानाध्यापक साहको हत्या भएको भन्दै परिवारजनले उचित न्याय पाउनुपर्ने मागसहित मिर्चैयाको कटारी चोकमा टायर बालेर प्रदर्शन गरेका छन् । सडक अवरुद्धका कारण सयौं सवारी साधन अलपत्र परेका छन् । प्रहरीले सडक खुलाउने प्रयास भइरहेको जनाएको छ ।

उनीहरुले घटनाको प्रकृति हेर्दा र भर्‍याङ र पासो लागेको कोठामा रगत देखिएकाले हत्या भएको आरोप लगाएका छन् । साहका श्रीमतीसहितका परिवार र स्थानीयले सुनियोजितरुपमा हत्या गरिएको आरोप लगाएका छन् ।

सोमबार बिहानैबाट साहकी श्रीमती मिना साहसहितका आफन्त र मिर्चैयाका स्थानीय सडक अवरुद्ध गरेर बसेका छन् । उनकी श्रीमतीले आफू मर्न तयार रहेको तर न्याय नपाएसम्म कतै नजाने र केही नखाने अडान लिएकी छिन् ।

प्रधानाध्यमपक साह आइतबार बिहान विद्यालयको कार्यालय भवनको तेस्रो तल्लामा पासो लागेको अवस्थामा मृत भेटिएका थिए । उनको शव पोष्टमार्टमका लागि त्रिवि शिक्षण अस्पताल काठमाडौं पठाइएको छ ।

यता प्रहरीले अहिलेसम्मको घटना प्रकृतिले आत्महत्याको संकेत गरेपनि अनुसन्धान जारी रहेको बताएको छ । प्रहरीले थप अनुसन्धान भइरहेको र पोष्टमार्टमको रिपोर्टपछि मात्र केही बताउन सकिने बताएको छ ।