लहानमा मेलाको आयोजना गरी स्वच्छता दिवस मनाइयो

फिरोज सिद्दिकी

लहान । ‘महिनावारी मैत्री विश्व’ भन्ने मुल नाराका साथ आज लहानमा पनि विश्व महिनावरी स्वच्छता दिवसको अवसरमा मेला कार्यक्रम मनाएका छन् ।

मे २८ अर्थात जेठ १५ गते यो दिवस मनाउने गरिए पनि यस वर्ष गणतन्त्र दिवसका कारण जेठ १६ गते अर्थात आज बुधबार लहानमा मेलाको आयोजना गरी मनाएका हुन् ।

कार्यक्रममा प्रमुख अतिथि लहान नगरपाकिका नगरप्रमुख महेश प्रसाद चौधरीले महिनावारी बिभेद र छुवाछुत जस्ता हानीकारक प्रथा परम्पराजन्य अभ्यासलाई कानुनले नै दण्डणिय बनाइसकेको अबस्थामा पनि हाम्रो समुदायमा महिनावारी सम्बन्धि गलत धारणा र त्यसबाट सीर्जित बिभेदकारी अभ्यास ब्याप्त रहेको बताउनु भयो । यो कुनै अभिसाप नभई प्रकृतिको उपहार हो भन्नु भयो ।

उहाँले महिला तथा किशोरीहरुको सम्मानित जिवन यापनका लागि स्वास्थ्य अधिकार सम्बन्धि अझ धेरै सचेतनामुलक कार्यक्रमहरु गर्न आबस्यक रहेको धारणा राख्नु भयो ।

त्यस्तै महिनावारीको समस्यालाई अझै गहिरिएर बुझ्न र यसलाई उचित व्यवस्थापन गर्नका लागि यो दिवस मनाइने गरिएको सरोकारवालाले बताएका छन् ।

अधिकांश महिलाहरु महिनावारी बारे अझै पनि खुलेर बोल्न नसक्ने भएकाले पनि यो दिवसको महत्व धेरै रहेको लहान नगरपालिकाका कार्यक्रम संयोजक महेश्वरी चौधरीले बताउनु भयो ।

उहाँले महिनावारी भएका महिलाका लागि आवश्यक ंस्वास्थ्य सुविधाको माग उठाउन र महिनावारीसँग सम्बन्धित गलत सामाजिक धारणालाई कम गर्न आवश्यक रहेको धारणा राख्नु भयो ।

मेला कार्यक्रममा लहानका १४ वटा विद्यालयका ३ सय भन्दा बढि किशोरीहरुको उपस्थित रहेको थियो भने आधा दर्शन विभिन्न शिक्षामुलक स्टलहरु राखिएका थिए ।

दलित जनकल्याण यूवा क्लव लगायतका संस्थाहरुको आयोजामा मेला कार्यक्रम सम्पन्न भएको थियो ।