नेपाल उद्यमी व्यवसायी कल्याणकारी संघद्वारा सरकरलाई चेतावनी, माग पुरा नगरे चरणबद्ध रुपमा आन्दोलन गर्ने

फिरोज सिद्दिकी

लहान । नेपाल उद्यमी व्यवसायी कल्याणकारी संघ, लहान सिरहाले एक विज्ञप्ति जारी गर्दै नेपाली अर्थतन्त्रमा गम्भीर आरोप लगाउदै नेपालको अर्थतन्त्र वित्तीय माफियाको नियन्त्रणमा रहेको भन्दै संघले १५ सयभन्दा बढी साना उद्यमी, किसान र समाजसेवीले आत्महत्या गरेको आरोप लगाएका छन् । बुधबार सिरहाको लहानमा पत्रकार सम्मेलन गर्दै जारी गरिएको प्रेस विज्ञप्ति मार्फत सो आरोप लगाएका हुन् ।

संघका अध्यक्ष खडग नारायण चौधरीद्वारा हस्ताक्षरित विज्ञप्तिमा भनिएको छ- बैंक तथा वित्तीय संस्थाहरुको कारण लाखौं महिला घरबारविहीन भएका छन् भने १० लाखभन्दा बढी साना किसान र व्यापारीहरू जीविकोपार्जनका साधनबाट वञ्चित भएका छन् ।

६० हजारभन्दा बढी नागरिक कर्जा सूचना केन्द्रको नाटकीय कालोसूचीमा परी बैंकिङ कारोबारबाट वञ्चित भएको संघले जनाएको छ । संघले नेपाल राष्ट्र बैंकको अव्यवस्थित मौद्रिक नीति यी समस्याको मुख्य कारण भन्दै मुलुकको खजाना निजी क्षेत्रका केही मुठ्ठीभरका हातमा सुम्पेर वित्तीय माफियालाई जन्म दिएको बताएको छ ।

प्रेस विज्ञप्तिमा बैंक तथा वित्तीय संस्थाले साना उद्यमी, मजदुर, किसान र गरिबलाई पुर्‍याएको विनाशको पनि कडा आलोचना गरिएको छ । विगत दुई वर्षदेखि लघुवित्त र बैंकको अव्यवस्थितता विरुद्ध आन्दोलन गर्दै आए पनि उनीहरुको समस्यामा कुनै चासो नदिएको संघले जनाएको छ ।

संघले बैंक तथा वित्तीय संस्थाको ब्याजदर एक अंकमा नै कायम गर्नुपर्ने र कर्जाको वार्षिक नवीकरण पाँच वर्षको लागि गर्नुपर्ने भन्दै १२ बुंदे आफ्ना मागहरु स्पष्ट गरेको छ । यसका साथै धितो राखेको सम्पत्ति लिलामी रोक्न, क्षतिपूर्ति उपलब्ध गराउन र मानसिक यातना अन्त्य गर्न माग गरिएको छ । संघले कालोसूचीको प्रक्रिया अन्त्य गरी साना व्यवसायीलाई सहयोग गर्न ऋण सुविधा उपलब्ध गराउन पनि माग गरेको छ ।

उद्यमी व्यवसायी कल्याण संघले आफ्ना माग पूरा गर्न नेपाल सरकारलाई एक महिनाको अल्टिमेटम दिएको छ र आफ्ना माग पूरा नभए आन्दोलनमा उत्रने चेतावनी दिदै जिल्ला प्रशासन कार्यालय सिरहा मार्फत नेपाल सरकार र सम्बन्धित निकायमा ज्ञापनपत्र बुझाएका हुन् ।

यी मागलाई समयमै सम्बोधन नभए चरणबद्ध रुपमा आन्दोलन गर्ने संघले घोषणा गरेको छ ।