आर्थिक सुधारका १२ वटा माग सहित नेपाल उद्यमी व्यवसायी कल्याण संघले अर्थमन्त्रीलाई बुझायो ज्ञापनपत्र

फिरोज सिद्दिकी

लहान । नेपाल उद्यमी व्यवसायी कल्याण संघले नेपाल बैंकका गर्भनर र संघिय सरकारका अर्थमन्त्री विष्णुप्रसाद पौडेललाई ज्ञापनपत्र बुझाएका छन् । मुलुकको वर्तमान आर्थिक तथा वित्तीय नीतिप्रति कडा आपत्ति जनाउदै संघर्ष समितिले ज्ञापनपत्र बुझाएका हुन् ।

ज्ञापनपत्रमा संघले नेपाल सरकारले लागू गरेको जनविरोधी आर्थिक नीतिका कारण साना उद्यमी, किसान र गरिब जनता ठूलो संकटमा परेको आरोप लगाएको छ । बैंकको स्वेच्छाचारी व्याज असुली र वित्तीय संस्था तथा लघुवित्त कम्पनीको अत्याधिक दबाबका कारण देशका एक हजार ५ सयभन्दा बढी साना उद्यमीले आत्महत्या गर्नुका साथै धेरै परिवार घरबारविहीन भएको संघको भनाइ छ ।

ज्ञापनपत्रमा संघले ब्याजदर एकल अंकमा (५ देखि ७ प्रतिशतसम्म) हुनु पर्ने, वार्षिक नविकरणको सट्टा पाँच वर्षका लागि कर्जा नवीकरण गर्ने, धितो लिलामी प्रक्रिया रोक्न, ऋणीहरुको ऋण माफीलगायत १२ वटा मुख्य माग राखेका छन् । साथैे बैंकिङ प्रणालीलाई कालोसूचीमा राख्ने प्रक्रिया अन्त्य गरी मिटर ब्याज पीडितको समस्या तत्काल समाधान गर्न माग गरेका छन् ।

संघका अध्यक्ष खडकनारायण चौधरीले आफ्ना मागलाई छिट्टै सम्बोधन नगरे संघले देशव्यापी सङ्घर्ष गर्ने र त्यसको सम्पूणर् जिम्मेवारी नेपाल सरकार र सम्बन्धित निकायको हुने चेतावनी दिएका छन् । ज्ञापनपत्रमा स्थितिमा सुधार नभए मुलुकमा वित्तीय माफियाको वर्चस्व झनै बलियो हुँदै आर्थिक भ्रष्टाचारमा थप वृद्धि हुने समेत उल्लेख छ ।