लहानमा धार्मिक सद्भाव र भाइचाराको सन्देश दिदै मनाए मोहम्मद जयन्ती

फिरोज सिद्दिकी

लहान । सिराहाको लहानमा पैगम्बर मोहम्मद (स.)को १४९९औं जन्मोत्सव धुमधामका साथ मनाइएका छन्। यस अवसरमा मुस्लिम समुदायले शान्ति जुलुस निकालेर जुलुस ए मोहम्मदी पर्व मनाएका हुन्। लहानमा आयोजित शान्ति र्‍यालीमा स्थानीय मुस्लिम समुदायका साथै हिन्दू धर्मावलम्बीहरू पनि सहभागि भएका थिए, जसले धार्मिक सद्भाव र भाइचाराको सन्देश फैलाएको छ।

र्‍यालीमा सहभागीहरूले विभिन्न धार्मिक नारा लगाउँदै शान्ति, सद्भाव र सहिष्णुताको सन्देश दिएका थिए। समाजमा सबै धर्मका मानिसहरूबीच एकता र भाइचारालाई प्रोत्साहन गर्ने उद्देश्यले यो पर्व मनाइएको हो। हिन्दू-मुस्लिम समुदायले परस्पर शुभकामना आदानप्रदान गरी यस दिनलाई सामाजिक सद्भावका रूपमा पनि मनाएका छन्।

युथ मुस्लिम वेल्फेयर सोसाइटी लहानले आयोजना गरेको शान्ति र्यालीमा स्थानीय नेताहरू, समाजसेवी र विभिन्न संघ-संस्थाहरूले पनि सहभागीता जनाउँदै पैगम्बर मोहम्मदको शिक्षा र आदर्शलाई समाजमा लागू गर्ने आवश्यकता रहेको बताए।