लहानको नहरमा ढल निर्माण रोक्न मधेश सरकारको निर्देशन

फिरोज सिद्दिकी 

लहान । मधेश प्रदेश सरकारको जलस्रोत तथा सिंचाइ विकास डिभिजन, सिराहाले लहान नगरपालिकालाई खुट्टी खोला सिंचाइ योजनाको नहरमा ढल निर्माण कार्य तत्काल रोक्न निर्देशन दिएको छ। 

डिभिजन प्रमुख हसमत अन्सारीद्वारा हस्ताक्षरित पत्र अनुसार, खुट्टी खोला सिंचाइ योजनाको हेडवर्क्स निर्माण कार्य पूरा भइसकेको छ र अब नहरहरुबाट पानी प्रवाह गर्दै कृषियोग्य जमिनमा सिंचाइ सुविधा प्रदान गर्न आवश्यक रहेको बताइएको हो।

योजनाको लागि चालु आर्थिक वर्षमा बजेट नछुट्टाइएकाले थप बजेट माग गरिएको पत्रमा उल्लेख छ। तर, हाल सो नहरमा ढल निर्माण भइरहेको जानकारी प्राप्त भएकोले यसले नहरको पानी प्रदूषित हुने र नहरको लेभलमा पनि असर पर्ने सम्भावना देखिएको हुँदा कुनै किसिमको ढल संरचना नहरमा निर्माण नगर्न नगरपालिकालाई अनुरोध गरिएको छ।

स्थानीय किसानहरू तथा सिंचाइ उपभोक्ताहरूले यस पत्रले किसानहरूको हित सुरक्षित गर्ने विश्वास व्यक्त गरेका छन्, किनकि सिंचाइ योजनाको प्रभावकारी संचालनले उत्पादनमा वृद्धि हुने अपेक्षा गरिएको छ।

खुट्टी खोला सिंचाई योजनाले यस क्षेत्रमा कृषि उत्पादनमा सुधार ल्याउने अपेक्षा गरिएको भएता पनि, नहरमा ढल निर्माणको मुद्दाले परियोजनाको भविष्यलाई अन्योलमा पारेको छ।