लहान नगरपालिकामा १ अर्ब २० करोड बढी बेरुजू

फिरोज सिद्दिकी

लहान । महालेखापरीक्षकको कार्यालयले लहान नगरपालिकामा आर्थिक वर्ष २०७९/८० को लेखापरीक्षण प्रतिवेदन सार्वजनिक गर्दै १ अर्ब २० करोड २७ लाख ३ हजार रुपैयाँ बेरुजू रहेको तथ्यांक सार्वजनिक गरेको छ।

नगरपालिकाको आर्थिक व्यवस्थापन र आर्थिक विवरणको लेखापरीक्षणपछि प्रतिवेदनमा ३५ करोड २२ लाख ५४ हजार रुपैयाँ थप बेरुजू भेटिएको उल्लेख छ। यो रकममध्ये १ करोड ८५ लाख २ हजार असुल गर्नुपर्ने, २० करोड ५२ लाख ८२ हजार प्रमाण कागजात पेश गर्नुपर्ने, ११ करोड ३ लाख ४३ हजार नियमित गर्नुपर्ने र १ करोड ८१ लाख २८ हजार पेश्की बाँकी रहेको तथ्यांक सार्वजनिक गरेको हो।

महालेखापरीक्षकको कार्यालयद्वारा जारी प्रतिवेदनमा नगरपालिकाले सार्वजनिक क्षेत्र लेखामानको पूरा पालना नगरेको र आन्तरिक नियन्त्रण प्रणालीमा सुधार गर्नुपर्ने देखिएको छ। साथै, ऐन-नियमको परिपालना, बजेट व्यवस्थापन, राजस्व संकलन, सार्वजनिक खरिद प्रक्रिया र सेवा प्रवाहका विषयमा सुधार आवश्यक रहेको प्रतिवेदनले औंल्याएको छ।

प्रतिवेदनअनुसार नगरपालिकाको वित्तीय विवरण तयार गर्ने जिम्मेवारी व्यवस्थापनमा रहेको र लेखापरीक्षण ऐनअनुसार लेखापरीक्षकको जिम्मेवारी समग्र वित्तीय विवरणको सत्यता जाँच गर्ने हो।

महालेखापरीक्षक कार्यालयले लहान नगरपालिकाको आर्थिक पारदर्शिता र जवाफदेहिता सुनिश्चित गर्न थप कदम चाल्नुपर्ने भन्दै सुझाव दिदै नगर प्रमुख र प्रमुख प्रशासकीय अधिकृतलाई वित्तीय प्रतिवेदनका प्रक्रियाहरूको निगरानी गर्न र बेरुजू रकमको समाधान गर्न विशेष कदम चाल्न आग्रह गरेको छ।

लहान नगरपालिकाका कुनै पनि प्रतिनिधिले हालसम्म यस प्रतिवेदनमा प्रतिक्रिया जनाएका छैनन्। तर, नगरवासी र सरोकारवाला निकायहरूले यस्तो ठूलो रकम बेरुजू देखिनु नगरपालिकाको वित्तीय व्यवस्थापनमा रहेको गम्भीर कमजोरीको संकेत भएको बताएका छन्।