होली पर्वलाई शान्तिपूर्ण र मर्यादित रूपमा मनाउन सिरहा प्रशासनको अपिल

फिरोज सिद्दिकी 

सिरहा, फागुन २७ गते । नजिकिँदै गरेको फागु पूर्णिमा (होली) पर्वलाई शान्तिपूर्ण, मर्यादित र व्यवस्थित रूपमा मनाउन सिरहा जिल्ला प्रशासन कार्यालयले एक सूचना जारी गरेको छ।  

जिल्ला प्रशासन कार्यालय, सिरहाका प्रमुख जिल्ला अधिकारी वासुदेव दाहालद्वारा जारी सूचनामा सबै जिल्लावासीलाई शुभकामना व्यक्त गर्दै होली पर्वलाई सभ्य, भव्य तथा सौहार्दपूर्ण रूपमा मनाउन अनुरोध गरिएको हो।  

सूचनामा उल्लेख गरिएअनुसार, होली पर्वको बहानामा जबरजस्ती रंग हाल्ने, प्लास्टिकजन्य लोला प्रहार गर्ने, फोहोर छ्याप्ने, यात्रुहरूलाई दुःख दिने, बाटो अवरुद्ध गर्ने, सवारीसाधनबाट रकम असुल्ने, मादक पदार्थ सेवन गरी सवारी चलाउने, सार्वजनिक स्थलमा हो-हल्ला गर्ने तथा चर्को आवाजमा डीजे बजाउने जस्ता क्रियाकलापलाई निषेध गरिएको छ।  

यस्ता अवाञ्छित गतिविधि गरेमा कानुनी कारबाही गरिने चेतावनी समेत दिइएको छ। प्रशासनले सबै नागरिकलाई सभ्य र सौहार्दपूर्ण वातावरणमा होली मनाउन आग्रह गर्दै शान्ति, सुव्यवस्था र सद्भाव कायम गर्न सहयोग गर्न अनुरोध गरेको छ।