लहानका युवाहरूको सक्रियतामा लुटिएका चामल फिर्ता हुँदै

• फिरोज सिद्दिकी

लहान । जेन्जी आन्दोलनको क्रममा लहानका सरकारी कार्यालय र प्रतिष्ठानबाट लुटिएका खाद्यान्न फिर्ता गर्न स्थानीय युवाहरू सक्रिय देखिएका छन्। उनीहरूले लहानका विभिन्न वडाबाट सङ्कलन गरी करिब एक सय बोरा चामल आजै खाद्य व्यवस्था तथा व्यापार कम्पनी लिमिटेड लहानलाई बुझाएका हुन्।

गत मङ्गलबार भएको आन्दोलनको क्रममा करिब १२ करोड रुपैयाँ बराबरको चिनी, चामल र अन्य बोरा लुटपाट भएको थियो। यस क्रममा आन्दोलनकारीहरूले सरकारी कार्यालय र प्रतिष्ठानमा तोडफोड तथा आगजनी पनि गरेका थिए।

जिल्ला प्रशासन कार्यालय सिरहाले लुटपाट गरिएका सार्वजनिक सम्पत्ति फिर्ता गर्न सूचना जारी गर्दै, एक साताभित्र सामान फिर्ता नगरे कानुनी कारबाही गरिने चेतावनी दिएको थियो। प्रशासनले स्पष्ट रूपमा भनेको छ, “आन्दोलनका क्रममा लुटिएको सरकारी र सार्वजनिक सम्पत्ति फिर्ता गर्न सबै जिम्मेवार नागरिकहरूलाई आग्रह छ। सात दिनभित्र फिर्ता नगरे कारबाही गरिने छ।”

यस घटनामा स्थानीय युवाहरूको सक्रियता र जिम्मेवारीपूर्ण पहल प्रशंसनीय रहेको स्थानीय बुद्धिजीवीहरू बताउँछन्। प्रशासनले पनि उनीहरूको योगदानको सराहना गरेको छ।