आन्दोलनमा लुटिएका सामान फिर्ता गर्न भगवानपुर गाउँपालिकाको आह्वान

फिरोज सिद्दिकी 

सिरहा । भगवानपुर गाउँपालिका कार्यालयले जेन-जी आन्दोलनका क्रममा तोडफोड र आगजनीमा हराएका तथा लुटिएका सामान फिर्ता गर्न आह्वान गरेको छ।

गाउँपालिकाले मंगलबार एक सूचना जारी गर्दै भदौ २४ गतेको आन्दोलनमा गाउँ कार्यपालिकाको कार्यालय र वडा नं. २ को कार्यालयमा भएको क्षतिको विवरण सार्वजनिक गर्दै ७ दिनभित्र सामान बुझाउन आग्रह गरेको हो।

सूचना अनुसार सिसिटिभी क्यामेरा, कम्प्युटर, प्रिन्टरसहित कार्यालयका अन्य सर-सामान केही व्यक्तिहरूले लगेका वा प्राप्त गरेका हुन सक्ने भन्दै ती सामग्री गाउँ कार्यपालिकाको कार्यालय वा अस्थायी प्रहरी पोष्ट भगवानपुरमा बुझाउन अनुरोध गरिएको छ।

गाउँपालिका अध्यक्ष उग्र नारायण यादवद्वारा हस्ताक्षरित सूचनामा तोडफोड र आगजनीले कार्यालय सञ्चालनमा गम्भीर असर परेको जनाइएको छ। उनले चोरी वा हराएका सामग्री फिर्ता नगरे कानूनी कारबाही हुने चेतावनी पनि दिएका छन्।