सांस्कृतिक चेतना र सामाजिक एकताको सन्देश महाशिवरात्री

लहान–२ भगवानपुरमा महाशिवरात्रीको अवसरमा सम्पन्न कलश यात्राले धार्मिक आस्थासँगै सांस्कृतिक चेतना र सामाजिक एकताको सन्देश दिएको छ। गणपति जनकल्याण सेवा समिति लहानको आयोजनामा भएको कार्यक्रममा महिला, युवा र वृद्धवृद्धाको उल्लेखनीय सहभागिता देखिएको थियो।

आजको व्यस्त जीवनशैलीबीच यस्ता धार्मिक कार्यक्रमहरूले समुदायलाई एकै ठाउँमा ल्याउने काम गर्छन्। विशेषतः युवापुस्ताको सक्रिय उपस्थिति सांस्कृतिक निरन्तरताको सकारात्मक संकेत हो।

महाशिवरात्री केवल पूजा आराधनामा सीमित नभई सामाजिक सद्भाव र सहकार्यको प्रतीकका रूपमा स्थापित हुँदै गएको देखिन्छ। लहान २, भगवानपुरमा सम्पन्न यो कार्यक्रमले लहानको सांस्कृतिक पहिचानलाई थप मजबुत बनाएको स्थानीयवासीले बताएका छन्।