देशका विभिन्न क्षेत्रमा तीव्र हावाहुरीको सम्भावना, सतर्क रहन सरकारी आग्रह

सिरहा। वैशाख १६ गते बुधबार देशका विभिन्न प्रदेशका जिल्लामा तीव्र गतिको हावाहुरी चल्ने सम्भावना रहेको भन्दै सरकारले सर्वसाधारणलाई सतर्कता अपनाउन आग्रह गरेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरण ले मंगलबार एक सूचना जारी गर्दै जल तथा मौसम विज्ञान विभाग को पूर्वानुमानलाई उद्धृत गर्दै कोशी, मधेश, लुम्बिनी र सुदूरपश्चिम प्रदेशका विभिन्न जिल्लामा हावाहुरीसहितको मौसम प्रणाली सक्रिय हुने जनाएको हो।

पूर्वानुमान अनुसार कोशी प्रदेशअन्तर्गत मोरङ सहित आसपासका जिल्ला, मधेश प्रदेशका धनुषा र बारा, लुम्बिनी प्रदेशका बर्दिया, बाँके, दाङ र अर्घाखाँची तथा सुदूरपश्चिम प्रदेशका डडेलधुरा र डोटी आसपासका क्षेत्रमा हावाहुरीको प्रभाव देखिने सम्भावना रहेको छ।

विभागका अनुसार बुधबार साँझ ५:४५ बजेदेखि हावाहुरी सुरु भई पर्सि बिहान ७:४५ बजेसम्म रहने अनुमान गरिएको छ। यस अवधिमा मेघगर्जन, चट्याङ, असिना र वर्षासहितको प्रणाली पश्चिमबाट पूर्वतर्फ सर्ने सम्भावना पनि औंल्याइएको छ।

प्राधिकरणले तीव्र हावाहुरीका कारण रुख तथा कमजोर संरचना ढल्ने, घरका छाना उड्ने, विद्युत तथा सञ्चार सेवा अवरुद्ध हुने लगायतका जोखिम रहेको जनाएको छ। यस्ता जोखिमलाई ध्यानमा राख्दै आवश्यक सावधानी अपनाउन आग्रह गरिएको छ।

सूचनामा हावाहुरीका बेला सकेसम्म घरबाहिर ननिस्कन, झ्यालढोका मजबुत रूपमा बन्द गर्न, कमजोर छाना भएका घरको संरचना बलियो बनाउन तथा आगो बाल्दा विशेष सतर्कता अपनाउन भनिएको छ। साथै, अग्ला रुख, विद्युतका खम्बा तथा तार नजिक नबस्न र लत्रिएको तार नछुन पनि आग्रह गरिएको छ।

सरकारले जल तथा मौसम विज्ञान विभागबाट जारी हुने नियमित मौसम पूर्वानुमान तथा प्राधिकरणका सूचनाहरूलाई निरन्तर पछ्याउँदै आवश्यक सतर्कता अपनाउन सर्वसाधारणलाई अनुरोध गरेको छ।