अगामी निर्वाचनमा जसपाको वर्चश्व हुने :अध्यक्ष यादव

जीबछ उदासी
लहान,फागुन ८ गते । जनता समाजवादी पार्टीका अध्यक्ष उपेन्द्र यादवले अगामी तीनै तहको निर्वाचनमा जनता समाजवादी पार्टीेको वर्चश्व हुने हुने बताउनु भएको छ । औरही गाउँपालिका–३ करहरबामा बृहत्त पार्टी प्रवेश कार्यक्रमलाई सम्बोधन गर्दै फागु्न ५ गते यस्तो बताउनु भएको थियो ।

प्रदेश २ को नमाकरण मधेस प्रदेश महत्पूर्ण उपलब्धी भएको उहाँले भन्दै संघीयता र आरक्षणको रक्षा जसपा बाहेक अरु पार्टीले गर्न नसक्ने भएकोले देशैभरीमा जसपामा प्रवेशको लहर चलेको तर्क गर्नुभयो । संघीयताको लागि मधेस आन्दोलनको जननी रहेको सिरहा जिल्लाको १७ वटै पालिकाहरुमा जसपाको मजबूत अवस्था बनाउन नेता कार्यकर्ताहरुलाई मञ्चबाटै अध्यक्ष यादवले निर्देशन दिनुभयो ।

उहाँले भन्नुभयो,‘नेपाली काँग्रेस र एमालेको प्रवृत्तिबाट मधेस प्रदेशका जनताहरु आजित भएर जसपा रोजिरहेको छ,विकास र निकास खोजिरहेको छ ।’ गठबन्धनमा रहेर पनि जसपाले आफ्नो राजनीतिक अडानबाट पछि नपर्ने अध्यक्ष यादवले दृढता व्यक्त गर्दै भन्नुभयो,‘मधेशी, महिला, जनजातिलाई अधिकार सम्पन्न नबनाएसम्म सडक,सदन र सरकारमा रहेर संघर्ष गरिरहने छौ।’

राष्ट्रिय सहमतिकै आधारमा एमसीसी पारित हुनुपर्ने अध्यक्ष यादवले भन्दै सबैको अनुहार झल्किने राष्ट्रियता र विकासलाई आधार मानेर जानुपर्ने धारणा व्यक्त गर्नुभयो ।‘संविधानको रक्षा र प्रतिगमनबाट देशलाई जोगाउन बनेको गठबन्धन तत्कालै भत्किँदैन । चुनावी तालमेलमा जसपाले आफ्नो हैसियत अनुसार स्थान सुरक्षित गर्नेछ’, उहाँले प्रष्ट्याउनुभयो ।

मधेस प्रदेशका भूमि व्यवस्था,कृषि तथा सहकारी मन्त्री बिजय कुमार यादवले मधेश प्रदेशको समृद्धिको आधार कृषिलाई उन्नत बनाउन सरकार काम गरिरहेको जानकारी गराउनुभयो । मधेसमा शिक्षा स्वास्थ्य कृषि र पर्यट्न विकासको मूल आधार मानेर बजेट विनियोजन गरेको उहाँले बताउनुभयो ।स्थानीय शिबजी यादव,राम खेलाउन यादव,रामनाथ यादव र रेणु देवी यादवको अगुवाईमा नेपाली काँग्रेस र नेकपा माओवादी केन्द्र परित्याग गरी सयौको संख्यामा जसपा प्रवेश गर्नेहरुलाई अबीर माला लगाई अध्यक्ष यादवले स्वागत गर्नुभयो ।