मधेसमा एमाले ठूलो पार्टी बन्ने निश्चित: नेता श्रेष्ठ

 जीवछ उदासी 

लहान,फागुन २९ गते । नेकपा एमाले पोलिटब्युरो सदस्य तथा मधेस प्रदेशका सह इन्चार्ज लिलानाथ श्रेष्ठ ले मधेस प्रदेशमा एमाले सबैभन्दा ठूलो दल हुने बताउनु भएकोछ । नेपाल वुद्धिजीवी परिषद् छैठौं जिल्ला अधिवेशनलाई गोलबजार चोहर्वामा सम्बोधन गर्दै यस्तो बताउनु भएको हो । 

देशैभरि एमालेमा प्रवेशको लहर चलेको भन्दै मधेस प्रदेशमा एमाले सबभन्दा बलियो र ठूलो पार्टी बन्ने निश्चित रहेको उहाँले दाबी गर्नुभयो । 

मधेसको समृद्धि एमाले बाहेक अरु दलले गर्न नसक्ने विश्वास मधेस प्रदेशको जनतामा हुन थालेकोले दिनहुँ प्रवेशको लहर चलेको नेता श्रेष्ठले बताउनुभयो । 

'छिमेकी मुलुक भारतमा चार सय वृद्धा भत्ता पाइरहेको छ भने नेकपा एमालेको सरकारले एक सयबाट सुरु गरेर चार हजार पुर्याएको छ । पद्मम शमशेरको पालामा शिलान्यास भएको हुलाकी मार्ग कसैले बनाउन सकेको थिएन । केपी ओली नेतृत्वको सरकारले १३ सय करोड बजेट बिनियोजन गरेर निर्माण सम्पन्न हुनै लागेको छ । कृषि उद्योग र भौतिक विकास गरेको एमालेलाई मधेसी जनताले प्यारो पार्टी ठानेर माया गर्न थालेकोले चारैतिर प्रवेशको लहर छ।'उहाँले प्रष्टयाउनुभयो । 

नेकपा एमालेले गरेको काम घरघरमा गएर जनतालाई बुझाउन सके जति दलले गठबन्धन गरेपनि एमालेलाई कुनै शक्तिले हराउन नसक्ने ठोकुवा गर्नु भयो ।