'बजार अनुगमनको दायरा फराकिलो हुनुपर्छ'

सम्पादकीय 

जीवछ उदासी 

यस वर्ष घटस्थापना भएपछि बजार अनुगमन लहानमा भइरहेको छ । वर्षमा दसैको मुखमा हुने अनुगमनको सकारात्मक र नकारात्मक पक्षबारे सामाजिक सञ्जालमा निकै टिका टिप्पणी भएको छ । वर्षभरी सुतेर बस्ने चाडपर्वको मुखमा मात्रै अनुगमन हुनुले संशय उत्पन्न भएको छ । अनुगम हुनुहुँदैन यो पनि ठीक तर्क होइन । अनुगमन त निरन्तर भइरहनुपर्छ । अनुगमनको आफ्नै नियम र संहिता छ । अनुगमन हुनुभन्दा पूर्व बजारमा अनुगमन गरिने क्षेत्रलाई कैयन पटक सचेत पनि गराउन जरुरी हुन्छ । चेतना र सचेतनाको नाममा कुनै प्रयास नगर्ने एकासी अनुगमन गरियो भने व्यापारमा हुने भय त्रास र निरासाको सम्बोधन कसरी गर्ने ? यसकोणबाट पनि प्रश्न उठ्नु स्वभिक हुन जान्छ । 

दसैंको बेला अनुगमन बजार क्षेत्रमा मात्रै गर्ने कि बोर्डर क्षेत्रमा पनि गर्ने । चाडपर्वको समयमा बोर्डरपारी भारतीय बजारमा भीडभाड र नेपालतर्फको बजार सुनसान रहेको यथार्ततालाई अनुगमनकारी निकायसँग कुनै कार्ययोजना छ कि छैन् ? नेपाली बजार भारतीय सीमा क्षेत्रले नै लिइरहने हो भने नेपाली अर्थतन्त्रको हाल के होला ? मधेसको सबै पैसा भारतीय बजारमा गएर नै खन्याउनुपर्ने अवस्थाको कसरी अन्तय गर्ने ? यसबारे अन्तरक्रिया छलफल नै गर्नुपर्ने आवश्यक्ता देखिएपनि कुनै पहलको सुरसार छैन् । 

अर्को पक्ष अनुगमन निरन्तर भइ रहयो भने बजार स्वच्छ रहन्छ तर त्यस्तो पनि भइरहेको छैन् । अनुगमन गर्ने टोलीमा हुनेहरुले गोप्यनताको कति ख्याल गर्छ ? योपनि मननीय बिषय हो । लहानको खसी बोका खरिद बिक्रीमा दुई सयको रसिद दिएर अढाई सय असुली गरिएको भिडियो नै आयो । पाँच हजारको बोका सात हजारमा बिक्रि भयो । तरकारी बजारमा भारतबाट एका बिहानै आउने तरकारी उपभोक्ताहरु खान बाध्य छन । यसको अनुगमन कसले र कहिले गर्ने ? अनुगमनको दायरा फराकिलो छ तर संकीर्ण भएर केहि क्षेत्रमा भइरहेको अनुगमनभित्र धेरै कुरा लुकेको हुन सक्ने चौतर्फी चर्चाको बिषय बनिरहेको छ ।