मधेश प्रिमियर लिग तेस्रो संस्करणको उद्घाटन खेलमा छिन्मस्ताको शानदार जित

राजविराज । मधेश प्रिमियर लिग (एमपीएल) को तेस्रो संस्करणको उद्घाटन खेलमा छिन्मस्ता रूपनी मधेश राइडर्सले दमदार प्रदर्शन गर्दै कोशी दुहबी क्यापिटललाई ५६ रनको फराकिलो अन्तरले पराजित गरेको छ।

मंगलबार राजविराजमा भएको खेलमा टस जितेर फिल्डिङ रोजेको कोशी दुहबीले छिन्मस्तालाई ब्याटिङको निम्तो दिएको थियो। छिन्मस्ताले १८ ओभरमा ६ विकेट गुमाउँदै १५४ रनको चुनौतीपूर्ण स्कोर खडा गर्‍यो।

छिन्मस्ताका लागि शंकर राणाले आक्रामक ब्याटिङ गर्दै सर्वाधिक ६५ रनको योगदान दिनुभयो। सन्तोष कार्कीले ३१ रन र रोहन विकले २२ रन बनाउँदै टिमको स्कोर मजबुत बनाउन साथ दिएका थिए। कोशी दुहबीका कृष्ण कार्की र आकाश त्रिपाठीले समान तीन तीन विकेट लिँदै प्रभावशाली बलिङ प्रदर्शन गर्नुभयो।

१५५ रनको लक्ष्य पछ्याउन मैदान उत्रिएको कोशी दुहबी १३.४ ओभरमै ९८ रनमा समेटियो। उसका लागि इसान पाण्डेले ३७, सोनु अन्सारीले २९ र दिपेश कडेलले १६ रनको योगदान गरेपनि अन्य ब्याट्सम्यानहरू धराशायी बने।

छिन्मस्ताका बलरहरूले उत्कृष्ट प्रदर्शन गरे। नारायण जोशी र दिनेश अधिकारीले समान ३–३ विकेट लिए भने अभिषेक कार्कीले २ र दिवान पुनले १ विकेट लिन सफल भए।

यसअघिको उद्घाटन समारोहमा मधेश प्रदेशका मुख्यमन्त्री सतिशकुमार सिंहले ब्याटिङ गरेर प्रतियोगिताको औपचारिक उद्घाटन गर्नुभएको थियो।

एमपीएलको यो विजयी सुरुवातसँगै छिन्मस्ता रूपनी मधेश राइडर्सले प्रतियोगितामा आफ्नो बलियो उपस्थिति जनाउँदै अगाडि बढेको छ।